रंगारेड्डी जिल्ह्यात एका महिला तहसीलदाराला कार्यालयातच जिवंत जाळल.

हैदराबाद []  तेलंगणातील रंगारेड्डी जिल्ह्यात सोमवारी एका महिला तहसीलदाराला कार्यालयातच पेट्रोल अंगावर ओतून जिवंत जाळल्याची खळबळजनक घटना घडली आहे. अब्दुल्लापुरमेट येथे या महिला तहसील कार्यालयात बसल्या होत्या. दुपारी एक व्यक्ती थेट कार्यालयात आली आणि त्यांच्यावर पेट्रोल ओतून पेटवून दिलं, अशी माहिती समोर आली आहे.

पोलिसांच्या माहितीनुसार, अब्दुल्लापुरमेट येथील तहसीलदार विजया रेड्डी या कार्यालयात बसल्या होत्या. त्याचवेळी हल्लेखोर तेथे आला. त्यानं रेड्डी यांच्या अंगावर पेट्रोल ओतले आणि पेटवून दिले. यात रेड्डी यांचा घटनास्थळीच मृत्यू झाला. तसंच त्यांना वाचवण्याचा प्रयत्न करणारे दोन कर्मचारी जखमी झाले आहेत. त्यातील एकाची प्रकृती गंभीर आहे.

सुरेश मुदिराजू असं या हल्लेखोराचं नाव आहे. त्यानं रेड्डी यांच्या अंगावर पेट्रोल ओतून त्यांना पेटवून दिलं. त्यावेळी सुरेशही भाजला. तो कार्यालयाबाहेर पळाला. त्याला रुग्णालयात दाखल करण्यात आलं आहे. घटनेची माहिती मिळाल्यानंतर रचकोंडाचे पोलीस आयुक्त महेश भागवत आणि वरिष्ठ अधिकारी घटनास्थळी पोहोचले. त्यांनी या घटनेची चौकशी सुरू केली आहे.

तहसील कार्यालयात दुपारच्या जेवणाची वेळ झाली होती. त्यामुळं कार्यालयात गर्दी नव्हती. त्याचवेळी सुरेश कार्यालयात आला आणि त्यानं रेड्डी यांच्या अंगावर पेट्रोल ओतले आणि पेटवून दिले. त्यानं हे कृत्य का केलं याचं कारण समोर आलं आहे. न्यायालयाच्या आदेशानंतरही तहसीलदारांनी त्याच्या जमिनीच्या दस्तावेजांमधील त्रुटी दुरूस्त केल्या नाहीत. त्यामुळं तो प्रचंड नाराज होता, असं कारण सांगितलं जात आहे. दरम्यान, भरदिवसा घडलेल्या या घटनेमुळं अधिकाऱ्यांमध्ये भीतीचं वातावरण आहे. या घटनेचा निषेध करत अन्य कर्मचाऱ्यांनी सुरक्षा पुरवण्याची मागणी केली आहे.